Екипа археолози од Самуиловата тврдина во писмо до Утрински, излезе во одбрана на Паско Кузман, нарекувајќи го алхемичар на археологијата. Во писмото се вели:
“Ова е препознатливиот восклик на човекот кој во последниве неколку недели ја разбранува широката јавност во Македонија – Паско Кузман. Брануваше и порано, но ова беше вистинска далга, силен удар врз него, а и врз македонската археологија. И се случи животиште… по којзнае кој пат.
Како реакција на овие случувања излегоа соопштенија од Македонското археолошко научно друштво и стручните екипи кои постигнуваа и постигнуваат забележителни успеси на стручно и научно поле, благодарение на ентузијазмот и визионерството токму на овој човек. Беше кажано речиси се’.
Затоа оваа реакција ќе биде едноставно израз на почит кон човекот кој целосно се вложува себеси за афирмација и адекватен третман на археологијата и нејзина промоција како наука која се базира на материјални докази и факти.
Неговата неприкосновена љубов кон културното минато на оваа грутка земја е движечката сила која ја разби долгогодишната летаргичност и зачмаеноста во археологијата. Потребна е голема храброст, знаење и умешност да ја оттргнеш историјата од прегратките на земјата и од заборавот на минатото и да и’ дадеш достоинствено место во современото светско културно наследство. Овој човек го правеше и го прави тоа… без оглед на цената и жртвата што треба да ја даде.
Во денешно време кога борбата за материјална егзистенција го има приматот над духовната димензија, а љубовта и почитта се подзборавена категорија, тешко е да се разбере човек како него. Но, сите што го познаваат, сите што работеле или соработувале со него го разбираат тоа.
Токму љубовта го направи своевиден алхемичар во археологијата, човекот кој го врати „Свети Климент“ на Плаошник, оној којшто руината на Високото кале во Охрид ја претвори во Самуилова тврдина, визионер кој од мртвите колци во водите на Охридско Езеро ја создаде наколната населба во Заливот на Коските… и на многу други локации од минатото им даде реална димензија во сегашноста… Зар ние да молчиме за делата што го носат неговиот печат и говорат гласно со јазикот на иднината.
На крајот, сакаме да потенцираме дека оваа реакција не е предизвик за еминентните душегрижници да си ги исплакнат своите остри јазици, ова е само израз на благодарност од една група институционално неприфатени и маргинализирани археолози – ентузијасти на кои Паско Кузман несебично им подаде рака и им овозможи да се докажат во археологијата како активни фактори, ” пишува екипа археолози од Самуилова тврдина во Утрински.