Сиријскиот претседател Башар ал Асад ја предупреди Анкара дека „скапо ќе плати“ за нејзината поддршка кон бунтовниците кои се обидуваат да го соборат неговиот режим, бидејќи тие „терористи“ набргу ќе влијаат и на Турција, изјави Асад во интервју емитувано на турската опозициска телевизија „Халк“.
„Во блиска иднина, тие терористи ќе влијаат на Турција, а Турција скапо ќе го плати својот придонес“, рече Асад, пренесува АФП.
Според Асад тероризмот не може да се користи како скриена карта, бидејќи тоа е исто како шкорпион кој нема да се двоуми да нападне во било кој момент.
Помеѓу многуте бунтовнички формации кои се борат во Сирија има неколку радикални исламистички групи, а владата на турскиот премиер Реџеп Тајип Ердоган, вкоренета во исламот, стана една од најпознатите подржувачи на сириските бунтовници, наведува француската агенција.
„Се што кажува тој за Сирија и нејзиниот народ се само лаги, ништо повеќе. Ердоган ги подржува терористите и тоа е се што тој прави“, надополнува Асад.
Односите помеѓу Дамаск и Анкара, некогаш блиски сојузници, се влошија по бунтовноста на народот во Сирија, која започна во март 2011 година и потоа прерасна во судир од поголеми размери, кој однесе повеќе од 115 000 животи, додека неколку милиони луѓе ги присили да ја напуштат земјата.