Агенцијата за аудио и аудио-визуелни медиумски услуги нема ингеренции да преземе мерки за континуираното ширење на говор на омраза на телевизија Сител, но затоа ќе направи анализа за она што се случуваше деновиве на вестите на оваа телевизија, за да се тргнат дилемите околу непримерните коментари, уривање на новинарските стандарди и ширење на говор на омраза. Оваа одлука беше донесена на денешната седница на АВМУ, односно на поранешниот Совет за радиодифузија, а на некоја од наредните седници ќе биде изготвена оваа анализа.
Со ова како што рекоа членовите на ова телото, можеби ќе му дадат материјал на Јавното обвинителство кое може да покрене постапка, доколку процени дека има потреба од такво нешто.
-Предлагам во некоја од наредните седници да се направи оваа анализа, а во исто време да се прати соопштение до медиумите во период кога почнува кампањата за претседателските избори да се внимава на запазување на новинарските стандарди, рече Миљаим Фетаи, потпретседател на АВМУ.
-Агенцијата со новиот закон за медиуми нема моќ да превзема мерки, но да не чекаме до нас да пристигнуваат претставки, да ја подготвиме таа анализа. Инаку, надлежно за говор на омраза е Јавното обвинителство порача Столе Наумов член на АВМУ.
На новинарско прашање, која е целта да се прави ваква анализа, доколку немаат надлежности да преземаат мерки, претседателот Зоран Трајчевски со одговор:
-За да ја разгледаме на советот.
НОВА праша, доколку има говор на омраза, каде треба да се обратиме, во полиција ли?
На ова Трајчевски одговори:
-Па вие веќе сте донеле пресуда, што не прашувате нас. Вие пресудивте, објавивте, осудивте уште луѓе во затвор да пратите и готово, рече нервозно Трајчевски.
Претставката доаѓа поради обраќањето на Драган Павловиќ Латас во саботните вести на Сител.