Унгарија понудила да организира конференција во Будимпешта за решавaње на проблемот со мигрантите на Балканот кој станува се позагрижувачки за ЕУ, заклучиле денес министрите за внатрешни работи на ЕУ на нивната средба во Брисел.
Се уште не е одреден точен датум за оваа конференција но веќе е познато дека на Малта ќе се одржи ваква средба на 11 и 12 ноември. Средбата која ќе се одржи во Будимпешта, доколку биде прифатен предлогот на Унгарија, “ќе даде свој придонес” а датумот ќе се определи на идната сесија на министрите за надворешни работи во октомври.
Но министрите не го отвориле прашањето за ѕидот што Унгарија го гради на границата со Србија за да ги спречи мигрантите да влезат во оваа ЕУ земја.
Советот на ЕУ заклучил дека заедничката надворешна и безбедносна политика е клучна за да зајакне соработката помеѓу земјите на потекло на мигрантите и земјите низ кои овие луѓе транзитираат како што се земјите од Балканот. Цел е «да се решат корените и да се спречи нерегуларната миграција вклучително шверцот на луѓе, и да се заштитат лицата на кои им е потребна меѓународна заштита и истовремено да се почитува правото на азил како и да се озбебеди враќањето у+и реадмисијата», вели министерскиот заклучок.
ЕУ ветува дека ќе работи со сите земји каде што демократијата не е силна за да се заштитат луѓето од политичко насилство, нарушување на човековите права и нивната тешка социо-економска положба: «Оваа соработка мора да биде заснована на дијалог, сопственост и поделена одговорност», вели ЕУ сакајќи да се обезбеди превземање на целосната одговорност за тешката положба на стотиците илјади мигранти кои одат кон ЕУ.
Советот донел одлука да ја зајакне соработката со клучните земји низ кои мигрантите транзитираат.
Пред еден месец Европската комисија најави дека работи на посебна програма за земјите од Балканот и Турција со која треба да им се помогне успешно да се соочат со мигрантската криза.
“Европската комисија ја финализира својата програма за менаџирање на мигрантската криза за Западниот Балкан и Турција кој изнесува 8 милиони евра и ќе почне да се спроведува во септември 2015 година. Комисијата размислува како да даде поддршка преку националните програми на ИПА која се фокусира на капацитетите на заинтересираните земји во областа на азилот, миграцијата и визната политика како и зајакнување на ранливите категории на мигранти и жртвите на шверцот со луѓе”, соопшти ЕК.
И додаде дека оваа помош ќе се фокусира на три области: “идентификација на мигрантите (отисоци на прсти), споделување на интрарегионални и интеррегионални информации и механизми кои ќе понудат решенија за враќање на мигрантите (во земјите од кои потекнуваат) и истовремена примена на практична заштита на специфичните потреби на мигрантите”.
На самитот во јуни, жестока дебата се одвиваше помеѓу загрижениот италијански премиер Матео Ренци и претседателот на Европската комисија, Жан-Клод Јункер, кој апелираше на задолжителни квоти.
Остана на тоа секоја земја самоволно да се произнесе за капацитетот кој го има за да прими бегалци.
Франција, Германија и Холандија сакаат сите земји да го прифатат предлогот на Европската комисија, кој се базира на проценка на населението, на капацитетите, на невработеноста и слични барометри.
Досега овој баланс не е постигнат. Министрите за внатрешни работи ја продолжуваат својата средба на која треба да се направи врамнотежена поделба на мигрантите во сите земји членки.
За побрзо постигнување на договор, се очекува помош од Норвешка, Швајцарија и Лихтенштајн.