Договорот за нормализација на односите што го постигнаа Белград и Приштина со посредство на ЕУ, претставува историско достигнување, оценува генералниот секретар на ОН, Бан Ки-мун во неговиот најнов тримесечен извештај за Косово, доставен до Советот за безбедност на Светската организација.
Поздравувајќи го постигнатиот договор, Бан оценува дека тој и дава „значителни овластувања на заедницата на српските општини“.
Во извештајот, кој се однесува на периодот од 16 јанури до 22 април, се повикуваат Белград и Приштина „да воспостават канали за комуникација и да вложат напори за спроведување на договорот“.
Како што пренесува приштинскиот весник „Трибуна“, во извештајот доминираат „позитивни тонови“ со пофалби за српските и косовските лидери, при што се избегнати критики за безбедносната состојба во Косово.