Министерот за правда, Блерим Беџети, за утре најави дека ќе поднесе пријава за клевета и навреда против пратеникот на ДПА Беким Фазлиу, пренесува Алсат-М.
По завршување на тридневниот ултиматум што министерот му го даде на опозицискиот пратеник за јавно извинување, Беџети решил да го предизвика пратеникот на суд.
>>Беџети: Фазлиу јавно да се извини или кривична пријава
„Морално и етички е и политичарите да понесат одговорност за јавно искажаниот збор. Ова е целта поради која најавив тужба. Сакам да ја информирам јавноста дека тужбата е во постапка и утре ќе биде поднесена соодветна пријава пред надлежниот суд. Верувам дека ова ќе служи како позитивен пример за сите нас што се занимаваме со политика и вршиме политички функции, да не го злоупотребуваме имунитетот и да се криеме зад него“, вели Беџети.
Тужбата на министерот Меџети е мотивирана по последната собраниска седница за пратенички прашања, на која пратеникот на ДПА, Фазлиу, ја праша министерката за внатрешни работи дали министерот бил фатен со оружје и дрога во полициска акција во ноќниот клуб „Шери“.
Министерот Беџети призна дека бил во локалот во текот на акцијата, но негираше дека кај него е пронајдено нешто нелегално.
Пратениците, според Уставот, уживаат имунитет и тие не може да бидат повикани на одговорност за ставовите кажани од собарниската говорница. Министерот Беџети го повика Фазлиу да се откаже од имунитетот за да се соочат на суд.