Одредени политички партии и центри се занимаваат со пласирање на лажни вести со цел да креираат паника и на таков начин, вештачки, да влијаат на зголемување на кризата, рече вечерва министерот за економија Крешник Бектеши.
Во гостување на дебата на ТВ 24, Бектеши уште еднаш истакна дека нема простор, ниту потреба од паника кај граѓаните зашто храна и нафтени деривати има.
Контролите во маркетите ќе продолжат, најави Бектеши, додавајќи дека секој граѓанин во секое време може да пријави недоследности и непочитувања на владините мерки на телефонскиот број 191.
Според него, земјава најдобро се справи со енергетската криза.
„Залихи на граѓаните не им се потребни. Имаме доволно прехранбени производи и нафтени деривати и тоа го кажуваме речиси секојдневно. Контролите на УЈП и Инспекторатот ќе продолжат. Доставивме барање до надлежните институции да постапуваат согласно законите за потрошувачите да бидат заштитени“, напомена министерот.
Извршниот директор на Стопанската комора на северозападна Македонија, Дрилон Исени рече дека бизнисите моментно се наоѓаат во незавидна состојба.
„Владините мерки го адресираат, пред сè, социјалниот елемент зашто со нив главно се поддржуваат ранливите категории граѓани. Бизнисите се наоѓаат во незавидна состојба. Цените растат, секоја фирма не е подготвена да работи со загуба. Има реален ризик некои компании да се откажат од одредени производи. Таму каде што маржата е ептен ниска, некои фирми користат кредит за да ги подмират побарувањата кон трети лица, па дури и за плати“, укажа Исени.
Според Ивица Јакимовски од Градежната комора, за 30 до 130 отсто се поскапени градежните материјали.
„Тоа влијае на реализација на проектите во ниско и високоградбата. Становите и воопшто, недвижностите се поскапени за 15 – 20 проценти што е далеку од поскапувањата на материјалите, а причината за тоа е должината на реализација на проектот. Значи, ова засега се најниските поскапувања на становите“, рече Јакимовски, додавајќи дека во време на криза е пресудно реализирањето на проекти.