„Немам доказ, но тврдам дека актуелниот претседател на Советот за радиодифузија, Зоран Трајчевски ќе биде нов прв човек на Агенцијата за медиуми која ќе го замени сосема Советот за радиодифузија, но и неговите членови ќе бидат трансферирани во оваа Агенција“, изјави за НОВА пратеничката на СДСМ, Весна Бендевска.
Таа за половина час ќе алармира, како што рече, за членот 23 кој се однесува на мерки кои ќе бидат превземени врз медиумите за непочитување на законот: опомена, прекршочни пријави, кривични пријави и бришење од регистар што е всушност амандман поднесен од ВМРО – ДПМНЕ и поминат низ комисиската расправа.
Бендевска во изјава за НОВА предупредува дека законот комплетно ќе ја легализира цензурата и ќе овозможи затворање на медиумим особено Интернет порталите како единствен критички филтер.
Во собранието е во тек расправа на второто читање за Законот за аудио и аудио визуелни медиумски услуги на која Весна Бендевска од собраниската говорница истакна: Зоран Трајчевски е веќе избран на извршниот комитет на ВМРО-ДПМНЕ, еден човек ќе прима директни наредби од Груевски и фамилијата да спроведува ништо друго освен медиумски мрак – рече пратеничката.
Министерот за информатичко општество тврди дека надлежноста врз електронските публикации е само административна, а не и програмска.
Интернет медиумот ќе мора да биде пријавен да биде во Централен регистер и да има импресум, а според она што министерот Ивановски го зборуваше Агенцијата ќе нема надлежност сама да реагира, туку само по пријава на граѓанин.
Реакциите на еснафските здруженија, пак, посочуваа дека законот е преобемен и непрецизен и има дупки низ кои ако некој сака, може да се протне со што опасноста од интернет цензура останува.