Чувствувам одговорност и затоа отворено зборувам и во Брисел и во Скопје за тоа дека не се исполнети некои од декемвриските заклучоци на Европската комисија, поради што и Македонија повторно не доби датум за почеток на преговорите. Тоа пред се е проблемот со името, добрососедските односи, политичкиот дијалог и уште некои реформи.
Ова во интервју за Радио Слободна Европа го истакнува вицепремиерот за евроинтеграции Фатмир Бесими, кој смета дека прашањето со името не е ексклузивно право на ниедна политичка партија, туку проблем кој бара консензуален пристап.
Вицепремиерот за евроинтеграции Фатмир Бесими во интервјуто, последниот предлог на медијаторот Метју Нимиц го оценува како добра основа за да се продолжи понатаму со преговорите, но за оваа прашање, според Бесими, и Република Грција треба да биде поактивна.
– Последниот предлог на медијаторот Нимиц претставува една добра основа да се продолжи понатаму со преговорите. Сметам дека за ова прашање и Република Грција треба да биде проактивна за да можеме посериозно да напредуваме во овој процес, значи добра основа да се продолжи понатаму со разговорите и од двете страни да се покаже поголема ангажираност, посебно од страна на Република Грција од кадешто очекуваме во наредниот период да покаже поактивен пристап кон ова прашање.
На прашањето од Радио Слободна Европа- Дали коалициониот пратнер на ДУИ има слух за апелите на Ахмети за решавање на спорот со името?“ Бесими одговара:
– Ако зборувам од позиција на политичка партија, ДУИ секогаш била транспарентна и отворена и внатре во институциите и во јавноста и конзистентно настапува во однос на своето политичко делување. По однос на важните државни прашања, односно политички прашања од државен интерес, досега неколку пати е утврден тој пристап да се даде приоритет на државните интереси пред кратко политичките интереси или партиските интереси – вели Бесими.