Вицепремиерот за евро-интеграции Фатмир Бесими експресно му одговори на екс-шефот на дипломатијата Антонио Милошоски, кој синоќа побара оставка од Бесими, со оглед на неговите ставови дека македонските институции се виновни што Македонија не е воопшто на дневен ред на Самитот на ЕУ.
Бесими иако експлицитно не му се обраќа токму на Милошоски, неговиот кабинет за НОВА изјави дека овој став треба да се чита и како одговор кон Милошоски:
-Процесот на зачленување на Република Македонија во евроатлантските организации е стратешки интерес на државата која ја има подршката од мнозинството граѓани на Република Македонија.
Ние, сите заедно како општество мора да изградиме волја и да вложиме напори за целосно да ја интегрираме нашата држава во ЕУ и НАТО. Ние имаме обврска на сите области значајни за овој процес да покажеме напредок, и за тоа институциите и партиите (без разлика дали се владини или опозициски) треба да преземеме одговорност и сопственост над процесот и потребните реформи.
Во таа смисла, прашањето за името е исклучително важно, и на него мора да покажеме посветеност и напредок. Наша обврска е паралелно, напорно да работиме и на сите останати потребни реформи и да ги спроведеме што побрзо и поквалитетно, за пристапниот период да го скратиме што е можно повеќе.
На крајот, по овие прашања не смееме да си дозволиме да се однесуваме пасивно, емотивно, или дневно политички, зашто тие претставуваат стратешки приоритет на сите граѓани на Република Македонија, вели Бесими на ФБ.
Имено, синоќа поранешниот шеф на дипломатијата Антонио Милошоски и на 24 вести ТВ порача дека “вицепремиерот за евроинтеграции Фатмир Бесими треба да размисли лично да преземе одговорност и да си поднесе оставка доколку смета дека не може да го координира процесот на приближување на Македонија кон ЕУ”.
-Ако некоја институција потфрлила во процесот на евроинтеграции, а вицепремиерот Бесими е одговорен за тој процес, тогаш тој треба лично да си преземе одговорност, зошто не реагирал навреме и можеби да размисли да си поднесе оставка ако смета дека не може да го координира тој процес.
Милошоски образложи дека Бесими има обврска навреме да алармира доколку некоја институција потфрла во испорачувањето на одредени резултати во реформите или во спротивно неговите оценки се само паушални:
-Доколку нема таква институција, тогаш оценувам дека тоа може да биде само една паушална изјава се со цел тој како човек, како политичар можеби да се допадне помалку или повеќе на одредена публика – домашна или меѓународна, изјави Милошоски.