Две турски компании влегуваат во последната фаза од изборот на јавен – приватен партнер кој ќе ја развива дистрибутивната мрежа во земјава за природен гас наменет за домаќинствата, а услов ќе биде на корисниците да им понуди опција за инсталацијата да плаќаат на рати. Самиот приклучок на мрежата нема да чини повеќе од 100 евра вели првиот регулатор во земјава Марко Бислимовски.
„Она што е важно е дека најважен тендерски услов ќе биде најниската цена која ќе се понуди за приклучок на природен гас. Нашите очекувања се дека тоа ќе биде под 100 евра по приклучок. Тендерирањето ќе започне од 100 евра и мислам дека тоа ќе претставува придобивка за домаќинствата кои ќе имаат низок трошок за приклучување. Очекуваме од новиот јавен-приватен партнер да обезбеди и соодветни евтини кредити кои ќе им овозможат на домаќинствата да ја заменат својата инсталација на рати на повеќе години“, рече Бислимоски.
Од општините, како што посочи, ќе биде побарано да даваат донации за домаќинствата кои ќе сакаат да се приклучат на мрежата на природен гас за овој еколошки енергенс да стане многу подостапен до граѓаните.
Од страна на РКЕ изработена е првичната верзија на новата методологија за определување на цените за дистрибуција на природен гас на мрежи кои ќе се градат од почеток. Целта е да се гарантира цената на гасот и да се прави контрола во првите години од работењето.