Од денес па сe до петок, културната понуда на градот под Пелистер ќе биде збогатена со Фестивалот на фолклорни игри и песни „Илинденски денови“.
Фестивалот е во организација на Националната установа Центар за култура-Битола. Ова ќе биде негово четириесет и четврто издание, со што спаѓа во редот на најстарите културни манифестации во државава.
Според зборовите на директорот на битолскиот Центар за култура, Борче Димитровски, покрај најдоброто од македонскиот фолклор, на фестивалот ќе настапат ансамбли и интернационални групи од Холандија, Унгарија, Словенија, Хрватска, Грузија, како и ансамблот „Кумагаја“ од Јапонија. Интернационалната вечер ќе се одржи на 1.август на сцената на античкиот локалитет Хераклеја.
Дел од фестивалската понуда на „Илинденски денови“ ќе бидат и манифестациите „Ехо од дамарите“, „На пладне во чаршија“ и „Оро на Широк Сокак“. Во рамките на фестивалот ќе биде одржан и семинар за традиционална музика и игра, а ќе биде промовирана и книгата на авторот Марко Китевски „Македонски празници и обичаи“. Фестивалот ќе биде затворен со концертот на Драган Даутовски.
Во отсуство на позначајни настани од другите сфери на секојдневието, Битола живее во знакот на културата. За тоа зборуваат и штотуку завршеното второ издание на „Битола Шекспир фестивал“, како и секојдневните културни збиднувања кои се дел од манифестацијата „Бит Фест 2014“.
Како најава на претстојниот 35. Интернационален фестивал на филмската камера „Браќа Манаки“ кој ќе се одржи од 13-19 септември, минатата недела беше соопштен лауреатот на наградата „Златна камера 300“ за животно дело, која оваа година му припадна на двојниот оскаровец, Англичанецот Крис Менџис.