Во организација на Блесок и СловоКулт, а со поддршка од Гете Институтот и
Друштвото за македонско-германско пријателство и соработка на 06.06.15, сабота, во 20 часот во кафе-книжарницата Децата од нашата улица (ул. Ленинова, Аминта Трети 29) ќе се одржи промоција на поетската книга од Михаел Кругер „После природата“ која излезе 2012. во издание на Блесок.
Избор на песните и превод од германски:
Елизабета Линднер
Програма: Претставување на авторот, разговор и читање поезија на македонски и германски со проекција на македонскиот превод. Во чест на Игор Исаковски авторот ќе прочита две негови песни во превод на германски. Во последниот дел е предвидено време за прашања од публиката, а потоа и потпишување на книги.
Вовед и претставување на авторот: Елизабета Линднер
Разговор со авторот: Никола Маџиров
Превод на разговорот: Емина Авдиќ
Читање одбрани песни: Елизабета Баковска
Организација за Блесок: Калина Буневска Исаковска
За Гете Институтот во Скопје директорот: Томас Дикхаус
Координација од ДМГПС: Сашо Андреевски
За сенките
Ги познавав добрите и лошите сенки,
беспросторните сенки на соништата, во кои теолози
се караат за јаболкото на раздорот, и за сенката
што ја фрлаат рибите и заитаните инсекти.
Дедо ми мешаше сенки во сеидбата,
за да порасне нешто што не е залудно,
и за плевата да не се дели од житото.
А еднаш ја видов сенката на птиците,
која висеше на каменот како волна на грмушка.
Од денеска и мојот сон фрла сенка
врз светот кој станува сè понеосветлен.
Михаел Кругер е роден 1943 во Витгендорф, Саксонија, пораснал во Берлин, живее и работи како издавач, уредник на списанието за литература „Акценте” и писател во Минхен. Од 1986 до 2014 директор на издавачката куќа Ханзер.
За своето дело има добиено бројни признанија, меѓу друго и наградите Петер Хухел, Ернст Мајстер за лирика, а 2010 престижната награда за литература Јозеф Брајтбах. Меѓу другото ги има објавено следните збирки поезија: Непосредно пред бурата (2003), Под отворено небо (2007), На чисто (2010), Подесување на времето (2013).
Почеток на летото
Летото држи предавање
за смртта, а сè внимателно слуша.
Крај бунарот стои старец
и пие, од рака в уста,
со себе на чисто. Неподнослива тегоба –
да се најде говор кој одговара.
Едно дете претрчува покрај него, колениците издраскани.
Молчи. Не сака да ја наруши тишината.
———————————————————————-
Повеќе песни од Кругер онлајн во Блесок 88 (и на англиски): http://www.blesok.com.mk/tekst.asp?lang=mac&tekst=1396&str=2#.VWooIuvfZd0
Или во печатеното издание на Блесок по поволна цена на читањето или потоа во сите книжарници и во Блесок продавница: http://blesok-shop.mk/mk/167-после-природата-9789989593741.html