Боб Дилан пред неколку дена одржа концерт за една личност во Академијата на музиката во Филаделфија. Се работи за ексклузивен концерт кој е дел од шведската филмска серија „Експериментирај сам“ во која луѓето учествуваат во настани одредени за поголема група луѓе.
Дилан настапи пред својот обожавател Фредерик Викингсон пред кој ги изведе „Heartbeat“ на Бади Холи, „Blueberry Hill“ на Фетс Домино, песната на Чак Вилс „It’s Too Late (She’s Gone)“ и уште една блуз мелодија која Викингсон не можел да ја препознае.
– Усните ме болеа од смеење, не можев да престанам да се смеам после концертот, изјави обожавателот на Боб Дилан. Тој раскажува како на сред мини концерт извикал „Супер свирка“ по што Дилан долго се смеел.
Мини-концертот е сниман со осум камери а 15-минутниот документарец ќе биде поставен на сервисот YouTube на 15.декември.