По вчерашната трагедија во Богданци каде што во фабриката за полнење на плински боци „Балкан – Гасови“, животот го изгубија тројца жители на село Ѓавато, Васе Дуев (42), Златко Дуев (59) и Благој Делков (40), од Јавното обвинителство, се вели дека телата не се предадени на семејствата, бидејќи се чека исходот од ДНК анализата која треба да заврши за 3 до 7 дена.
По увидот на надлежен обвинител е констатирано дека фабриката каде што избувнал пожарот се состоела од повеќе простории. Тројцата починати биле во просторијата каде што се вршело полнење на мали плински боци, додека во просторијата каде што се вршела изработка на плинските боци пред полнење, работеле преживеаните лица.
Во разговор со надлежниот обвинител, управителите на фирмата известиле дека во овие простории имало складирано над 1000 пакети со мали плински боци кои биле спремни за извоз наредниот ден. Освен ова, во дворното место се наоѓале и две цистерни кои во моментот биле полни со пропан бутан гас и една празна цистерна.
Вината за трагедијата најверојатно ќе се утврди откако ќе се види видео снимката од безбедносните камери на објектот. По наредба на Јавниот обвинител ќе се проверува и целокупната документација за заштита и безбедност при работа, исправноста на функционирањето на машините, како и почитувањето на сите прописи за работа на овој вид дејност.
Жителите на селото во шок и неверување од вчерашната трагедија, велат дека трагично починатите биле добри и мирни луѓе. Еден од починатите бил во роднинска врска со сопственикот на фабриката.
Тетката и тетинот на Васе со солзи во очите говореа пред камерата на НОВА за страшната несреќа која го снајде нивниот внук.
„Не беше оженет, живееше со мајка му. Но еве и Васе го снајде истата судбина како неговиот татко, и тој почина на негова возраст. Сега мајка му остана сама“, велат Љупчо и Линка.
Љупчо додава дека во целата оваа несреќа, сепак не се случило она најлошото од кое можело да настрада целиот град Богданци.
„Доколку експлодирала најголемата боца, која тежи околу 20 тона, тогаш ќе се случеше бомба која ќе го уништеше целиот град“, објаснува Љупчо.
Во вчерашниот пожар во фабриката „Балкан Гасови “ во Богданци, три лица го загубија животот, додека две се повредени. Исто така причинета е и материјална штета, а во околината на фабриката биле опожарени повеќе возила.