Заев веројатно ќе му помага на Ковачевски, но не верувам дека ќе се меша во неговата работа, вели Стефан Богоев, член на ИО на СДСМ, поранешен градоначалник на Карпош, пратеник и долгогодишен претседател на младината на партијата за Утрински брифинг по вчерашниот конгрес на СДСМ.
– Зоран Заев е претседател на СДСМ од 2012 година и тоа е долг период ако се земе предвид што сѐ се случуваше во тој период. Особено ако се земе предвид Вистината за Македонија, за што ретко кој би се осмелил и потоа и Шарената револуција. Тој направи голми работи кои остануваат како голем бенефит за државата. Оттука, кај голем број членови има жалење што тој си заминува. Но, од тоа што јас разговарав со него, тој вели дека постојано ќе биде тука на располагање иако нема да се меша во кадровската и другите политики на партијата, вели Богоев.
Со повлекувањето на Заев, иако ќе има нов ЦО и ИО кои ги избира претседателот, Богоев вели дека ќе има нови луѓе па дури и луѓе кои не се во партијата, но се стручни, а можно е да има и некои постари луѓе од партијата оти намерата е да се стави акцент на членството.
-Членството ќе биде консултирано за сите одлуки. Партијата има добар информатички систем со контакт на сите членови. Така, можно е членовите да добијат СМС порака со прашање и има 24 часа да одговори со свое мислење. Така членството ќе биде обединето, вели Богоев.
За опасноста дека ваквиот начин на комуникација може да предизвика популизам и клиентелизам Богоев вели дека вчерашниот избор покажува дека тоа нема да биде така. Според него, добро е што тројцата кандидати зборуваа за своите програми, а не за кадровска политика.