На болните од леукемија им е неопходна терапија од лекот „тасинга“, односно „нилотиниб“, кој претставува алтернатива за првостепениот лек „гливек“. Станува збор за дваесеттина пациенти, меѓу кои и две деца, што треба да го примаат овој лек бидејќи другите не им делуваат. Од Здружението на болни од леукемија велат дека заболените се во многу лоша состојба и се едни од најобесправените пациентски групи во светот.
Од таму бараат лекот „тасинга“ да се стави на позитивната листа на лекови, бидејќи ниту една земја не воведе лекови кои се копии на оригиналниот „гливек“ без да обезбеди алтернатива, односно второстепена терапија.
„Сите заболени од хронична миелоична леукемија во светот, па и во Албанија и Србија имаат второстепена терапија. Мора да најдеме начин и модус како да се бориме нашите пациенти да ги обезбедиме со лекови. Месечната терапија со „тасигна“ би чинела околу 4.000 евра според ценовниците достапни од Бирото за лекови. Доколку се преземе нешто на ниво на држава, ако таа се зема во пакет со „гливек“ како што е во сите други земји во светот, мислам дека ќе биде многу поевтино изјави Пепо Леви, претседател на Здружението на болни од леукемија.
Болните цели десет години чекаа да се стави на позитивна листа епохалниот лек „ гливек“ кој е спас за пациентите. Од Здружението прашуваат дали и во овој случај треба да се чека да поминат 10 години за лекот „тасинга“ да се стави на позитивна листа на лекови.
„Затоа ги молам сите надлежни, особено Министерот Тодоров да го земе во предвид ова наше барање, особено ако се знае дека зад него стојат и Клиниката за хематологија, како и Друштвото на хематолозите на Македонија, рече Пепо Леви.