Лидерот на проруските бунтовници, Александар Бородај и ги предаде црните кутии на делегација од Малезија во Доњецк во присуство на околу 150 новинари.
Двете страни во седиштето на самопрогласената Народна Република Доњецк, во регионот Доњецк, потпишале документ, кој Бородај го нарекол „протокол со кој се финализира оваа процедура“.
Бородај прогласи прекин на огнот во радиус од 10 киломери на местото на авионската несреќа.
Претставникот на Малезискиот совет за национална безбедност, полковникот Мохамед Сакри, пред новинарите истакнал дека сите црни кутии се „во добра состојба“.
Возот со телата на жртвите од соборениот малезијски авион во источна Украина, пристигна во Харков, кој е под украинска контрола. Од таму, телата ќе бидат испратени во Амстердам, од каде што полета авионот на Малезијан Ерлајнс.
Малезиски патнички авион на летот МХ17 од Амстердам за Куала Лумпур мината недела беше соборен во Источна Украина, при што загинаа сите 298 патници и членови на екипаж, каде се водат жестоки борби помеѓу проруските бунтовници и украинската војска.