Во мојот 71-годишен живот помнам само двајца семожни политичари. Лазар Колишевски и Никола Груевски. Овој помладиов, кој е барем десетпати помоќен од својот харизматичен претходник, веројатно не е ни свесен што му е подметнато со лустрирањето на одамна починатиот академик Славко Јаневски, вели во својата писмена реакција која ја објави mkd.mk, познатиот македонски писател Божин Павловски и додава:
„Стравични ќе бидат последиците и за владејачката партија и за културниот и творечкиот амбиент во Македонија. Не верувам дека премиерот го одобрил овој срамотилак и простотилак и се надевам брзо ќе реагира, колку-толку, да ја санира штетата“.
Славко Јаневски беше темпераментен уметник и во своите рекордни 60 години на културната ветрометина полемизирал со многу свои колеги. Сепак, не можел да влијае негативно врз творечките процеси и гарантирам дека не им нанесол
пакост ниту на колегите Петре М. Андреевски и Гане Тодоровски, ниту пак мене. Напротив, тој помогнал да се изострат естетските критериуми,додава Павловски. Тој смета дека, како што ги нарекува, „Господата лустратори“ не знаат да им пристапат на досиеjата што постојат за сите важни персони во Македонија, тие се инструирани од некого да ја компромитираат забрзаната македонска еманципација.
Славко Јаневски од еснафот, од културата и просветата, се доживува како духовен межник. Во уметноста тој е нешто слично како Блаже Конески во науката, вели акдемик Божин Павловски во отвореното писмо преку кое го повикува премиерот веднаш да реагира, зашто, во спротивно, ќе ескалира целата ситуација како онаа со размената на територии. Тој нагласува:
,,Жал ми е што морам вака да реагирам при моето триесет и прво
враќање во својата прва татковина. Доколку се охрабруваат разни групи од мародери, нема зошто да си доаѓам. Туѓи ми се политичките типови што режираат безнадеж во македонската средина“.
Акдемик Павловски додава дека Славко Јаневски создал импресивен творечки опус, што го учеа многу генерации, бил неповторлив истражувач во просторот и времето и, експерт за македонскиот јазик. Впишан е со златни букви меѓу основачите на највиталните културни и творечки институции на Република Македонија.
(фотографија: Дневник)