Браќата Тавитјан по фантастичните концерти во Швајцарија, Ерменија и Србија ќе одржат целовечерен солистички концерт во најпрестижната концертна сала “Карнеги хол” во Њујорк на 24 февруари следната година.
Досега во “Карнеги хол” настапувале: Битлси, Боб Дилан, Лед Цепелин, Ролинг Стоунс, Пинк Флојд, Брус Спрингстин, Френк Синатра, Оскар Петерсон,Чајковски, Ела Фицџералд.
Тавитјан на њујоршката публика ќе и го презентираат новиот материјал кој се состои од обработки на класични дела од Бах, Моцарт, Чајковски, Рахманинов, како и нови авторски композиции и една македонска традиционална песна.
Гости на концертот ќе им бидат клавијатуристот на Мајкл Џексон и Кристина Агилера – Морис Плежр и џез-пејачката номинирана за Греми, Розен Витро, со по една композиција. Последниот настап на Тавитјан во Големото јаболко беше во легендарниот џез-клуб Блу Ноут.
По концертот во “Карнеги хол” браќата Тавитјан ќе имаат концерт и во “Ројал Алберт хол” во Лондон, како први македонски музичари со концерт во оваа британска концертна сала. По овие настапи следуваат концертите во Санкт Петерсбур и во Швајцарија.