Брисел очекува дека денес ќе има договор за изборното законодавство. Тоа што рокот е пробиен за неколу часа не е голем проблем, но доколку денес се дојде до договор.
Ова е првата неофицијална реакција која доаѓа од Брисел. Во Европската комисија (ЕК) очекуваат да се постигне договор што е можно побрзо:
“Партиите сабајлево повторно седнаа на маса и преговорите продолжуваат. Најважно е да се дојде до консензус и сите страни од преговорите да се согласат со она што ќе биде договорено”, вели изворот на НОВА во Брисел.
Комесарот Јоханес Хан со големо внимание ги следи настаните но денес не се очекува негова реакција на најновиот развој на настаните.
Засега нема реакција од Брисел ниту на предлог-законот што вчера го поднесоа ВМРО-ДПМНЕ и ДУИ. Но, Европа повеќе не го крие своето незадоволство од постојаните тензии, убедувања и притисоци со кои меѓународната заедница мора се служи за да се дојде до договор.
“Околу предлог законот може само да каже дека треба да се почека и да се види дали денес ќе има некаков напредок околу сето тоа. Но, веќе се навикнавме на вакви изненадувања во Македонија”, вели нашиот извор.
Одложувањето за една недела на објавувањето на годишниот извештај на ЕК за Македонија и другите балкански земји не е поврзано со преговорите во нашата земја. Но Брисел не крие дека ова одложување всушност е добра вест за Македонија. Со ова притисокот врз страните во преговорите продолжува.
Во Брисел неофицијално информираат дека ќе има промени во презентацијата на извештаите и стратегијата на проширувањето но тврдат дека се до последен момент никој не може да каже дали препораката за преговори за членство за Македонија ќе најде место во извештајот. Се зависи од почитувањето на договорот од Пржино.
За потсетување: ЕК го одложи за седум дена објавувањето на годишните извештаи и стратегијата на проширувањето поради тоа што на првично предвидениот датум, 14 октомври, се одржува самит на ЕУ посветен на миграцијата. Самитот ќе го привлече целото медиумско внимание во ЕУ а ЕК би сакала нејзините наоди за Балканот да го најдат заслуженото место во европските медиуми.