Македонските институции треба веднаш да ја завршат својата работа а јавните функционери треба да покажат дека се одговорни и да носат одговорност за нивните постапки.
Со овие зборови Европската комисија (ЕК) денес повторно реагира на настаните во Македонија, овој пат по објавувањето на разговорите во кои се откриваат манипулациите на изборите.
“Ние веќе ја искажавме нашата длабока загриженост од она што се обелоденува во земјата околу мешањето во судските работи, слободата на медиумите и сега и изборните неправилности. Очекуваме дека институциите во земјата ќе ја работат својата работа и ќе ги бранат фундаменталните вредности – веднаш”, вели преку соопштение Маја Коцијанчич, портпарол на комесарот за проширување Јоханес Хан и на шефицата на надворешната политика на ЕУ Федерика Могерини.
ОБСЕ и ОДИХР кои ги набљудуваа изборите во Македонија во нивните извештаи ја искажале исто така нивната загриженост, потсетува ЕК на заклучоците на ОБСЕ и ОДИХР по изборите во Македонија.
“ОБСЕ и ОДИХР во нивните обсервации на претходните избори покажаа загриженост околу матните врски помеѓу државата и партијата, заплашувањето на гласачите и пристрасноста на медиумите. Последните сознанија од прислушкуваните разговори се чини дека ги потврдуваат тие стравови, кои би биле длабоко вознемирувачки. Очекуваме од одговорните тела да ги истражат овие наводи веднаш и транспарентно на независен, непристрасен и кредибилен начин.
Европската комисија повторува дека јавните функционери треба да се однесуваат одговорно и да преземат одговорност за своите акции“, вели последното соопштение на ЕК.