Дали разбравте што кажа женскиот глас во рекламата за лекот? Доколку не разбравте може да ја слушнете уште еднаш, можеби ќе ви стане јасно што сака да објасни.
За да ви стане појасно, ова е дел од реклама за лек која оди на радио, но такви се и телевизиските реклами за сите лекови за кои е дозволено рекламирање . Станува збор за лекови кои може да се купат слободно во аптеките без лекарски рецепт.
Тие се рекламираат како безопасни и најчесто природни, но замката е сокриена во вториот дел од реклама, токму во делот во кој се состои предупредувањето каде се вели дека пред употреба треба да се консултира лекар или фармацевт. Но, токму тој, најважниот дел се кажува со таква брзина, што едноставно не може да се разбере ниту по пет пати слушање.
Едно истражување кое било спроведено во Универзитетот во Мичиген покажало дека околу 40 проценти од родителите на децата им даваат лекови кои не смеат да ги користат бидејќи предизвикуваат сериозни последици по нивното здравје.
-Најчесто на децата им се даваат лекови против кашлање или настинка кои не смеат да ги користат деца под две или четири години бидејќи може да предизвикаат мамурност, забавено дишење,алергиски реакции, халуцинации, грчеви, нееднакви срцеви очукувања.Тие препарати не го намалуваат времето на траење на инфекцијата и погрешната употреба може да предизвика сериозни нарушувања. Но, она што збунува е што деталите обично се содржани на позадината на кутијата од лекот, напишани се со ситни букви или се читаат брзо во рекламите, така што родителите не можат да го дознаат она што е најважно, пишува професорот Matthew Davis, во списанието New Science Monitor.
Според Американската агенција за храна и лекови(FDA),лекови без рецепт не треба да се даваат на деца кои се помали од две години..Но, поради ваквиот тип на реклами или поради ситните букви на позадината на пакувањето од лекот, овие предупредувања тешко допираат до родителите, тие најчесто не можат да ги слушнат, разберат или прочитаат.
Ова се случува во многу земји од светот, а во Македонија е тренд во последните неколку години. .
НОВА се обиде да истражи зошто е тоа така, зошто токму најважниот дел е најмалку забележителен при рекламирањето на лекот.
Во Фармацевстката комора на Македонија велат дека според Европските директиви, задолжително е при рекламирањето на лекот да се предупредат граѓаните дека пред употребата на препаратот кој е за само излекување, да консултираат лекар заради можни несакани ефекти.
-При рекламирањето на лековите без разлика дали се домашни или од странство, треба јасно и гласно да биде кажано дека пациентот треба да се консултира со лекар пред да почне да го користи лекот бидејќи може да предизвика сериозни несакани ефекти. Доколку пациентот не е информиран за ова предупредување, несаканата реакција може да биде опасна по неговото здравје, изјави за НОВА Бистра Ангеловска претседател на Фармацевската комора на РМ.
Ангеловска смета дека станува збор за маркетиншки трик, најверојатно за да се заштеди време или да се стави акцент на првиот дел од рекламата за да се има впечаток дека само тој лек делува најдобро.
Според Петар Арсовски, маркетинг експерт, основата причина за ваквиот начин на рекламирање е да се заштеди во време, бидејќи рекламите, особено телевизиските, се многу скапи. Една секунда рекламен простор чини од 50 до 180 евра, во зависност на која телевизија се емитува рекламата и во кој дел од програмата.
-Секоја секунда е драгоцена. Замислете, со 10 секунди се заштедуваат цели 1800 евра. Можам да ви кажам дека забрзувањето на текстот што се чита, некогаш се прави вештачки на компјутер бидејќи со таква брзина никој и не може да го прочита. За разлика од кај нас, во Србија и Хрватска задолжително е во делот кој се пушта во етер забрзано, да биде испишан текст со она што се кажува, изјави за НОВА Арсовски.
Со ваквиот начин на рекламирање луѓето не ја добиваат вистинската информација за лекот кој го користат пишува New Science Monitor.
– Деталите се обично во тој дел и тие се најважни, вели професорот Matthew Davis.
Експертите предупредуваат дека треба да се најде начин како да се избегне ваквиот вид на рекламирање, бидејќи претставува манипулација на потрошувачите, на луѓето кои сакаат да земаат одреден лек, а всушност ја немаат вистинската слика за него, ниту знаат какви реакции и несакани ефекти може да предизвика во нивниот организам. .