Бугарија денеска ќе гласа на вонредни парламентрани избори, кои беа распишани по оставката на Владата на Бојко Борисов во февруари, иницирана од масовните граѓански протести против поскапувањето на електричната и топлинската енергија и корупцијата во државата.
Главната битка се води меѓу двете водечки сили и во досегашниот состав на Собранието – популистичката десно-центристичка партија Граѓани за европски развој на Бугарија (ГЕРБ) на Борисов и Бугарската социјалистичка партија (БСП) на Сергеј Станишев.
Според последните анкети на јавното мислење, ГЕРБ може да очекува меѓу 22 и 24 отсто од гласовите, а социјалистите 17 до 18 проценти.
На трето место се очекува да влезе впартијата на бугарските Турци, Движењето за права и слободи (ДПС), кое може да се надева на шест до седум отсто од гласовите.
Изборниот праг од 4%, според анкетите, ќе го помине националистичката партија Атака, со поддршка на пет до шест проценти од гласачите.
Од останатите партии, најблиску до изборниот праг е конзервативното Движењето Бугарија на граѓаните (ДБГ)на Меглена Кунева, на која анкетите и даваат подршка од нешто под четири%, додека сите останати политички сили, според испитувањата на јавното мислење, се далеку од влез во Парламентот.
Сепак, изборите започнуваат со темна дамка, кога пред два дена Јавното обвинителство откри 350.000 гласачки ливчиња во печатницата „Мултипринт“ во градот Костинброд, кои не припаѓале во предвидениот законски број на гласачки ливчиња наменети за утрешните вонредни парламентарни избори.
Гласачките ливчиња, биле пронајдени синоќа после што било алармирано јавното обвинителство, кое наредило истрага- проверка на печатницата и да се испитаат сведоците.
Печатницата е затворена, изборниот материјал е запленет и поднесени се кривични пријави против сопственикот кој важи за близок на партијата на Бојко Борисов.
Печатницата „Мултипринт“ е во сопственост на локален советник од партијата Граѓани за европски развој на Бугарија (ГЕРБ), која досега беше дел од владината коалиција.
Нивното образложение е дека како и во секој процес на технологија, при печатењето се произведува вишок материјал, кои според законот требало да се чува до завршување на изборите, а потоа да биде уништен.