Бугарите протестираат против новата влада во која доминираат социјалистите. Седми ден по ред во главниот град Софија се собраа илјадници демонстранти. Зад нив застана и православната црква.
Слогани како „Мафија“ и „Оставка“ извикуваат веќе една недела илјадници Бугари, кои се собираат на протести пред парламентот и владините институции во Софија. Тие со погрдни зборови се обраќаат до новата владина коалиција од социјалистите и партијата на турското малцинство (ДПС). Тие бараат оставка на новата влада, само три недели откако ја презеде власта.
Во текот на ноќта демонстрантите ја блокираа најголемата крстосница во главниот град. Нивно главно барање е премиерот Пламен Орешарски веднаш да се откаже од власт и да се организираат нови избори, пренесува Дојче Веле.
Исто така во повеќе други бугарски градови се одржаа протестни манифестации. Незадоволството на граѓаните го предизвика именувањето на Делјан Пеевски за шеф на тајните служби. Иако тој не ја прифати функцијата, протестите продолжуваат.