Бугарската реакција околу оваа изложба во однос на Македонија е задоцнета и има друга позадина која не е позната, реагира миистерството за култура на одлуката на регионалната канцеларија на УНЕСКО за изложбата Имагинарен Балкан.
Изложбата успешно беше отворена за прв пат во Љубљана на 9-ти април 2013-та година за време на состанокот на министрите за култура на Југоисточна Европа. Исто така, по тој повод со поддршка на УНЕСКО и ИКОМ беше отпечатен и каталог кој е резултат на заедничката работа на сите координатори. Потенцираме дека отворањето на изложбата и печатењето на каталогот не беа предмет на забелешки на ниту една од земјите-учеснички во овој заеднички проект со УНЕСКО”, реагираат од Министерството за култура за „Макфакс”, коментирајќи ги обвинувањата од бугарското министерство кое тврди дека Македонија сака да направи фалсификат на бугарската историја, преку тоа што на оваа изложба Гоце Делчев го именува како Македонец, а оваа забелешка се користи и при именувањето на знамето на Крушевската Република.
Претходно Макфакс јави дека регионалната канцеларија на УНЕСКО во Венеција испратила писмо во кое бара да бидат покриени етикетите, вклучувајќи ги и оние на англиски јазик, кои се однесуваат на Гоце Делчев и Знамето на Крушевската Република, презентирани на изложба во Белград.
Се работи за патувачката изложба „Имагинарен Балкан, идентитетот и сеќавањата во 19-тиот век”, организирана од оваа организација во Белград, го пренесува Макфакс написот на News.bg.