Непристоен предлог од македонската гранична полиција добил еден од најпознатите бугарски музичари Ицо Хазарта од групата “Апсурд“ пишува бугарски Дневник Пред два дена бугарскиот музичар заедно со три танчарки требало да настапат на концерт во дискотека во Виница, но наместо тоа биле вратени назад во Бугарија.
Според изјавата на раперот македонските цариници му удриле црн печат, под изговор дека не можат да бидат сигурни во целта на неговата посета. Но, вистинската причина според Хазарт, сепак е одбивањето да им даде поткуп пишува бугарскиот „Дневник“.
“Полицаецот ме праша каде одиме и зошто. Одговорив дека имаме концерт и дека еден дел од екипата поминаа пред околу еден час. Тој ме праша многу пари ли ќе заработам од концертот. Му одговорив дека најважно е концертот да помине добро. Потоа ме праша повторно многу ли пари заработуваме, како и дали брзаме многу. По ова прашање мојот одговор беше: “Нема да ти дадам пари”.
Во меѓувреме, тимот на издавачка куќа Facing The Sun успеал да подготви копија од договорот и да го испрати, но цариникот објаснил дека немаат компјутер, туку само факс, но и дека не го знае бројот..
“Полицаецот дојде и рече дека не пристигнало ништо, и сигурно нема и да пристигне – ни удри по еден црн печат во четирите пасоши”, раскажува Ицо Хазарта за бугарскиот медиум.
Од македонското МВР потврдија за НОВА дека на 11 август четири лица од кои три женски и едно машко сакале да преминат на бугарско -македонската граница кај Делчево.
Тие се преставиле дека одат на настап во Виница, по што цариниците им побарале покана или одобрение од Министерството за култура дека ќе извршуваат таква дејност, која што тие немале да ја приложат.
Марија Јаковлевска од Секторот за односи со јавност на МВР демантира дека во нивните пасоши бил ставен црн печат. Во изјава за НОВА таа појасни дека станува збор за нормален печат кој бил прецртан, како доказ дека не им бил дозволен влез таа вечер.
-Тие можат уште денeска да ја преминат границата ако сакаат, бидејќи немаат забрана за влез во Македонија, изјави Јаковлевска.
Сепак, Ицо Хазарта и Facing The Sun веќе поднеле жалба против активностите на македонските цариници и имаат намера да ги алармираат сите инстанци, за да не се повторуваат слични полициски самоволија во пракса, пренесуваат бугарските медиуми.