Премиерот на Бугарија, Кирил Петков денеска ќе престојува во посета на Битола, каде ќе отвори клуб во состав на културниот центар „Иван Михаилов“.
Бугарскиот премиер ќе биде придружуван од потпретседателката на Бугарија, Илијана Јотова, од министерката за надворешни работи, Теодора Генчовска и од поранешната шефица на дипломатијата, Екатерина Захариева кои ќе промовираат владини проекти. Петков претходно ќе има средба со здруженија на бугарски граѓани во земјава.
Во делегацијата што ја предводи Петков ќе има луѓе од различни партии што ќе дадат поддршка на бугарската заедница во Северна Македонија и кои ќе потврдат дека, како што рече, Република Северна Македонија треба да биде дел од Европа и дека двете страни ќе се движат во таа насока.
По свеченоста во Битола, бугарскиот премиер Петков и министерката Генчовска заедно со своите домаќини, македонските министри за надворешни работи Бујар Османи и за транспорт и врски, Благој Бочварски ќе извршат увид на електро-енергетскиот проект „Битола 2“ кој е во рамки на Коридор-8 и наменет е за реализација на интерконекција меѓу Северна Македонија и Албанија.
Потпретседателката на Бугарија, Илијана Јотова во недела ќе престојува и во Охрид каде ќе го посети Дневниот центар за деца со аутизам, соопштија од нејзиниот кабинет. Проектот е финансиран од бугарската влада како дел од програмата на Министерството за надворешни работи „Бугарска развојна помош“. Јотова ќе присуствува и на отворањето на канцеларија на Здружението за толеранција и соработка „Хоризонти“.