Копенхаген: Владите на Данска и нејзината полуавтономна област Гренланд денеска заеднички се извинија за тоа што девојчиња и жени од домородното население на Гренланд биле подложени на присилна контрацепција до пред половина век.
Речиси 150 жени од народот Инуити минатата година ја тужеа Данска и нејзиното Министерство за здравство, барајќи отштета бидејќи сметаат дека властите им ги прекршиле човековите права кога им вградиле интраутерини контрацептивни влошки (спирали).
Некои од жените, вклучително и многу кои во тоа време биле тинејџерки, не биле свесни за тоа или не дале своја согласност.
Данските власти минатата година соопштија дека дури 4.500 жени и девојчиња, односно половина од жените во репродуктивна возраст на Гренланд во тоа време, добиле спирала во 1960-те и до средината на 1970-те години.
Наводната цел била да се ограничи растот на населението на Гренланд, кое тогаш брзо растело поради подобрите услови за живот и подобрата здравствена заштита.
– Не можеме да го смениме тоа што се случило. Но, можеме да преземеме одговорност, рече данската премиерка Мете Фредериксен и се извини во име на данската држава, признавајќи дека присилната контрацепција довела до физичка и психолошка штета.