Центарот за јавно здравје во Велес реагира на текстот каде што деканот на Факултетот за ветеринарна медицина, Дине Митрев тврди дека методите за испитување на листерија во Институт се промашени и не се точни. Реакцијата ја објавуваме во целост.
„Лабораторијата на Центар за Јавно Здравје Велес е акредитирана од институтот за акредитација на Република Македонија за детекција на листерија моноцитогенес во прехранбени производи,согласно МКЦ ЕН ИСО 11290 од 2008 година.
Центарот за јавно здравје Велес гарантира за точноста на постапката при идентификација на изолатот. Добиената мостра која е доставена до ЦЈЗ Велес со записник од државен санитарен и здравствен инспекторат е сечкан свински врат во вакуум -пакување со бар код 2860960763300230.
Примерокот е испитуван по гореспоменатата акредитирана метода при што е изолирана листерија моноцитогенес.
Поради настанатите околности на појава на смртни случаи од заболени лица од листерија, заради дополнително потврдување на резултатот, изолатот е испратен до Институтот за микробиологија и паразитологија при Медицинскиот факултет-Скопје.
На овој Институт исто така е потврдено дека се работи за листерија моноцитогенес. Во консултации со Институтот за микробиологија и паразитологија, изолираниот примерок е доставен до Факултетот за ветеринарна медицина за генетска типизација, со која е утврдено дека тој сој на листерија е со 98% сличност со генетскиот материјал од бактеријата изолирана од заболените лица.
Со истата пратка беше доставен уште еден примерок од бактерија листерија моноцитогенес најден во фабриката Екстра мејн. Се работи за полу-готова смеса за производство на шунка од пилешки гради, за доиспитување на Институтот на микробиологија и паразитологија, каде исто така се потврди дека се работи за листерија моноцитогенес.
И овој примерок беше пратен за ДНК типизација. За тој примерок добив информација дека има различна ДНК и не е причина за појавената болест.
Центар за Јавно Здравје Велес гарантира за точноста на издадените резултати. Несериозни се нападите и изјавите во дел од медиумите на лица кои не се запознати со процедуратана испитување во ЦЈЗ Велес“, се вели во реакцијата на Центарот каде што е директорка др. Флорентина Ристовска Шурбевска.
Во електронска пошта доставена до медиумите Ристовска Шурбевска вели:
—
„Ве замолувам сите медиумски куќи да известувате објективно и да не правите хистерија, бидете објективни, тоа го заслужуваат заболените и починатите од оваа болест.
При испитувањата што ги вршевме, баравме бактерија предизвикувач и храна, носител на бактерија, со цел да нема нови заболувања, а не со цел некого да обвинуваме. Мислам дека и вие не треба било кого однапред да ставате на столб на срамот. Дозволете институциите на системот да си ја вршат својата работа, пишува Ристовска Шурбевска, која ги испрати и следните документи:
