Центарот за развој на медиуми поднесе 68 амандмани на предложените Закон за медиуми и Закон за аудио и аудиовизуелни медиумски услуги- девет на Предлог-законот за медиуми, и 59 на Предлог-законот за аудио и аудиовизуелни медиумски услуги.
Амандманите кои се однесуваат на казнените одредби, комерцијалната комуникација, како и на регулаторните тела, се испратени до Собранието, до политичките партии, до Министерството за информатичко општество администрација и до Секретаријатот за европски прашања.
„Центарот за развој на медиуми го следи процесот на донесување на новото законодавство кое се однесува на медиумите и на сите јавни расправи што беа досега организирани јасно го изрази своето несогласување со регулација на печатените и електронски медиуми.
Нагласуваме дека остануваме на нашиот добро познат став, што го делиме со другите медиумски и новинарски организации: ЗНМ, МИМ и ССНМ – Законот за медиуми е непотребен, затоа што дел од прашањата што ги регулира можат да се регулираат со интервенции во други, веќе постоечки закони, а дел од прашањата треба да бидат оставени на саморегулација на печатените и онлајн медиумите.“, стои во образложението на ЦРМ.
>>Селмани: Дајте им униформи и ленти на новинарите
На вчера одржаната јавната дебата за законите за медиуми Насер Селмани, претседателот на Здружението на новинари во своето обраќање до министерот за информатичко општество Ивановски, тој искажа револт поради тврдењето на министериот дека новинарските организации кои ја бојкотираат расправата не доставиле забелешки за законот.
„Запрепастен сум што новинари бараат да се лиценцираат. Па ајде воведете и униформа за новинарите и по можност некоја трака. Зошто не е транспарентен податокот колку пари Владата троши во медиумите што е одговор од јавен интерес“, праша Селмани.