Лекарската комора ги брани интересите на докторите, но не може да штити криминал во работењето на докторската фела вели Кочо Чакаларовски, актуелен претседател на Лекарската комора, еден месец по апсењето на очниот хирург Дејан Ставриќ.
– До Лекарската комора досега не стигнал официјален документ за или против работењето на доктор Ставриќ, така што секој е невин додека не се докаже спротивното. За жал тоа се докажа во една кратка судска постапка која не траеше повеќе од еден ден, одговори Чакаларовски на прашањето на НОВА за официјален став во однос на апсењето на нивниот колега .
Тој вели дека Судот треба да одлучи дали и на колку време може да му биде одземена лиценцата за работа на Ставриќ.
-Ние од судот немаме добиено никаков официјален документ за пресудата на доктор Ставриќ и неможеме да поведеме никаква постапка околу неговото одземање или не одземање на лиценца. Доколку лекарот повеќе од шест месеци не се појави на работа го губи работното место, а за одземање на лиценца не може да стане збор додека не добиеме барање, односно правосилна судска одлука. Во законот за здравствена заштита стои дека лиценца се одзема во случај на нестручност или за постапка која ја наведува Судот и оваа институција всушност одлучува дали ќе му биде одземена лиценцата и на колку време, вели Чакаларовски.
Неофицијално, во пресудата немало такво барање, а јавниот обвинител нема дадено предлог за одземење на лиценцата на очниот хирург Ставриќ.