Критичкото новинарство за власта е “предавничко”
Слободата на медиумите постојано се влошува во Македонија. Тоа го покажуваат и сите истражувања во оваа област спроведени од релевантни меѓународни организации.
„За жал власта овие оценки кои доаѓаат од релевантните светски организации ги толкува како притисок од надвор за да се профати промена на името”, изјави претседателката на Сидикатот на новинарите на Македонија, Тамара Чаусидис на Спик ап конферецијата во Брисел посветена на слободата на медиумите на Западниот Балкан и Турција.
Чаусидис во излагањето ги повика европските институции да извршат поголем притисок врз властите во Македонија со цел да се подобри се позагрижувачката ситуација со слободата на медиумите.
Кога станува збор за европската администрација нивните критики варираат во зависност од тоа што владата ветува и како се пазарат со Брисел. Слободата на говор во Македонија стана заложник на спорот на името, што е неприфатливо, истакна Чаусидис.
„Критичкото новинарство е изложено на се поголем притисок и на говор на омраза од страна на владината пропаганда. Критичките новинари се прогласуваат за платеници, предавници па и криминалци”, изјави Чаусидис. Таа исто така потенцираше дека последниот случај со притворањето на новинарот Кежаровски испраќа дополнителен застрашувачки сигнал кои дополнително ќе го обесхрабри се помалиот круг на новинари кои се посветени на истражувачкото новинарство.
На панелот на конференцијата во Брисел учествува и вицепремиерот за европски интеграции Фатмир Бесими кој изјави дека Македонија е изложена пред предизвици во сферата на слободата на медиумите но дека владата е посветена тие предизвици да бидат надминати.
„Се надевам дека сега откако се формираше Анкетната комисија ќе може да се обнови дијалогот со ЗНМ преку кој ќе можеме да усогласиме текст за законот кои ќе ги задоволи интересите на сите страни”, изјави Фатмир Бесими на конференцијата во Брисел.