Четири месеци пред почине малата Тамара Димовска, Фондот за здравство ги стопирал сите операции на деца кои требало да бидат пратени во странство поради деформитет на рбетниот столб. НОВА дојде до документот со кој Фондот ги известува Клиничките конзилиуми и двете лекарски комисии, првостепената и второстепената дека „не треба да издаваат предлози за лекување во странство за искривување на рбет бидејќи болеста не бара итност, односно не е акутна.
„Осигурениците кои во моментот или во периодот од следните два до три месеца имаат или ќе имаат потреба од изведување на ваков вид на интервенции истите соодветно ќе бидат третирани и планирани за лекување во новиот Спинален центар“, се вели во дописот од Фондот.
Со овој документ се потврдува изјавата на Аспазија Софијанова дадена за НОВА, каде таа рече дека наредбата дошла од „горе“.
Нема одговор од Фондот за здравство зошто се ветувало лекување во странство на малата Тамара Димовска, кога документот е испратен четири месеци пред таа да почине.
Дали со ова изгубило драгоцено време за деветгодишното девојче, за да се добие во време, да се отвори и промовира новиот Спинален центар. За овој центар никој знае каде се наоѓа ниту кој оперира таму бидејќи нема лекари кои оперираат комплицирани деформитети на рбетниот столб во Македонија.
Дали оваа нередба доаѓа директно од Фондот или од Министерството за здравство како креатор на политиката во здравството и зошто досега ова се криеше од јавноста?
Од каде стигнала наредбата не одговорија ниту од Министерството за здравство.
Дали овој документ ги амнестира лекарите од двете комисии во Фондот за здравство, кои долго време не даваа зелено светло за девојчето да може да се оперира во странство. Мајката на Тамара, Жаклина Димовска со солзи во очите изјави дека институициите предвеме одлучиле за живото на Тамара.
„Се надевам дека вистината ќе излезе на виделина. Со овој документ се докажа дека цела држава си играла со животот на Тамата. Иако министерот Тодоров вети дека ќе се лекува во странство и до последен момент наводно бараа клиника каде ќе се оперира, тие всушност предвреме одлучиле дека нема да се лекува во странство“, изјави за НОВА мајката на Тамара, Жаклина Димовска.