Се чини дека Јанис Музалас се спаси од оставка. Прашање е дали Панос Каменос ќе се спаси ако Алексис Ципрас реши да му покаже каде се наоѓа вратата која води надвор од грчката владина коалиција.
Грчкиот министер за имиграција Музалас направи голем “грев” во очите на министерот за одбрана Каменос од националистичката партија Незвисни Грци, дел од владината коалиција. Во едно интервју Музалас го изговори името Македонија зборувајќи за нашата држава.
Громовите на Каменос во истиот момент се истурија врз Музалас. Каменос побара итна оставка бидејќи, како што рече, тоа е црвена линија преку која тој не може да мине.
Музалас веднаш се извини за, како што рече, гафот и доби поддршка од владата која соопшти дека, цитирам, «напорите да се ослабне министерот кој секој ден се бори со бегалската криза се неодговорност и хипокризија, особено сега пред самитот на европските лидери».
Патем за Музалас велат дека напорно и одговорно работи за да ги подобри условите во натрупаните центри за бегалци на грчките острови.
Имаме во моментов поважна работа, си рече Ципрас и замина на самит во Брисел.
Токму на самитот можеше да се забележи дека Ципрас во Брисел беше гостин на европските социјалисти. Кои се прашуваат што бара националистот Каменос во владата предводена од Сириза.
Видовме дека Ципрас не твитна ништо за оваа епизода а бидејќи денес без Твитер нема политика, јасно е дека грчкиот премиер не се возбуди поради овој настан. Твитна Јоргос Папандреу и напиша дека Ципрас мора да го чува Музалас бидејќи се работи за демократски избор и прогресивност.
Оваа епизода со Музалас и Македонија јасно покажа дека постои јаз помеѓу Сириза и Независните Грци кои се наоѓаат на два различни краја на политичкиот спектар.
Кој би бил заклучокот од сето ова. Во Брисел се слуша дека Ципрас можеби сака го замени Каменос со социјалистите од Пасок. Или едноставно сака да му стави на знаење на Каменос дека не е време за ирационални кавги и дека никој не е незаменлив.
Одговор ќе добиеме по сесијата на грчкиот парламент закажана за вторник.