Тензиите околу гласачките места кај Дом на градежните растат во попладневните часови, наводно поради очекување на бран гласачи од Пустец, Албанија, кои и минатиот круг на гласање предизвикаа сериозни сомневања за демографска интервенција во општина Центар, известува Цивил.
Кај ФФМ неколку набљудувачи забележаа гласачи од Пустец, но и од општините Велес, Струмица, Кавадарци, Аеродром и Бутел, како и гласачи родени во „ХХК“, односно без место на раѓање.
Во ходниците на ОУ Песталоци забележани се вооружени полицајци.
Пред Домот на градежните, припадници на полицијата во униформа и во цивилна облека легитимираат и ги запишуваат присутните новинари, а при тоа одбиваат самите да се претстават пред нив.
Партиски активисти попречувале телевизиски екипи и новинари да ја вршат својата работа на неколку избирачки места во Центар.
Набљудувач на Цивил е попречен во својата работа од страна на изборната комисија на избирачкото место 2839 (Работнички универзитет). По интервенција на Мобилниот тим на Цивил, набљудувачот продолжи со работата.
Јавно прозивање на гласачи во избирачкото место 2854 кај ФФМ.
Според телефонско јавување од еден граѓанин, едно лице се однесувало насилнички кај избирачкото место 2808 во присуство на полицијата која, според јавувањето, не реагирала на ова однесување.
Организиран превоз и агитирање се регистрирани во Житоше, општина Долнени, каде е забележително големо присуство на полицијата. На полициско возило во с. Дебреште, општина Долнени, пред гласачко место е монтирана камера насочена кон влезот во гласачкото место.
Пред гласачкото место 2839 кај Работнички универзитет стојат партиски активисти и ги убедуваат граѓан(к)ите дека гласањето не е денеска, туку на 28 април или ги убедуваат дека тоа не е нивно гласачко место.