Нерегуларности, притисоци, тензии, манипулации, демографски интервенции и друг вид структурно насилство се карактеристика на овој изборен циклус воопшто, а вчерашниот ден на прегласување не беше исклучок од оваа слика, изјавија од граѓанската асоцијација „ЦИВИЛ “ на денешната прес-конференција.
Според нив, болните, лицата со посебни потреби, невработените, децата и младите, корисниците на социјални надоместоци, сиромашните се луѓето кои беа масовно злоупотребувани, уценувани и манипулирани и врз кои падна товарот на недемократското делување на центрите на моќ.
Драстичен пример за тоа ја наведуваат манипулацијата со граѓаните на Пустец, Албанија кои беа злоупотребени и изложени на секаков вид понижувања и јавно жигосување.
Регистрирани се и гласачи на кои во личните документи не им е впишано местото на раѓање, а наместо тоа впишано е „ХХК“.
Меѓу многубројните неправилности кои го свртеа вниманието на „ЦИВИЛ” беа посочени попречување на телевизиски екипи и новинари да ја вршат својата работа, како и малтретирање и физички напад врз нашата новинарка на НОВА која беше удрена од едно лице во избирачкото место 2855 во Дом на градежници, за што Цивил има документирана изјава.
Голем дел од медиумите беа повторно послушни инструменти во рацете на политичките актери и ја потврдија сликата на земја во која слободата на говорот на медиумите е на многу ниско ниво. Овие медиуми придаваа големо значење на активностите на властите, во кои директно се посочени сечење ленти и фрлање лопати кои беа со намера за промоција на кандидатите на овие избори, на крај додаде Анушка од граѓанската асоцијација „ЦИВИЛ “.