Хрватска денеска стана членка на ЕУ, Србија доби датум за преговори, а Косово договор за стабилизација и асоцијација. Само Македонија остана со празни раце, се вели во анализата на Радио Слободна Европа.
Поранешниот амбасадор на Македонија во НАТО Нано Ружин вели дека владата не е компактна во прашањето за спорот со името, бидејќи ДУИ е за негово решавање за разлика од тврдиот став на ВМРО ДПМНЕ. Според него, се поставува прашањето дали воопшто премиерот Никола Груевски сака Македонија да влезе во ЕУ и НАТО.
„Знаеме кога го запрашале, кога било дилемата дали да најде компомис за името или да влезе во ЕУ, тој рекол дека не сака да најде компомис, бидејќи не сака да ја плати цената за тоа. Затоа јас сум голем скептик за тоа дали оваа влада на ДПМНЕ е способна, дали има храброст да го изнајде тој компомис.“
Политичкиот аналитичар Исмет Рамадани вели дека владата нема капацитет за изнаоѓање на компромисно решение, бидејќи е влезена во една политичка дипломатска битка со Грција со нервозен вокабулар и реченик.
„Така што во една ваква ситуација сите изјави кои доаѓаат од Грција и од тука од челните луѓе на државата, не останува многу простор за да се најде компромис, единствено ако има некој притисок од меѓународна заедница.“