Премиерот на Србија, Ивица Дачиќ изјави дека е сигурен во добивањето датум за почеток на преговорите за придружување кон ЕУ на Србија. Тој очекува посета од претседателот на Европскиот совет, Херман ван Ромпуј во Белград.
Дачиќ изрази надеж дека во следнава недела ќе биде завршен планот за имплементација на бриселскиот договор и рече дека во другата половина на мај, очекува продолжување на разговорите со Приштина на највисоко ниво.
„Сакаме Србија да биде добра вест во светот и очекуваме добра вест и од Брисел“, изјави српскиот премиер на конференцијата „Како до преговори со ЕУ“, по повод Денот на Европа.
Првиот човек на Владата на Србија, оценува дека наредните денови ќе бидат клучни за тоа дали Србија ќе успее да ги заврши сите подготовки за добивање конечна позитивна одлука, објаснувајќи дека тоа нема да биде само одлука на Европската комисија, туку и на Европскиот совет.
„За да стигнеме до таа процедура, ние мораме практично во наредните неколку денови да го утврдиме планот за имплементација од договорот, а подоцна би била и процедурата во парламентите на земјите членки, и очекувам да во другата половина на јуни, биде потполно јасно дека Србија ќе ги започне преговорите“, нагласи српскиот премиер.
Според зборовите на Дачиќ, денес не постои дилема во Србија, барем кај главните политички фактори, дека главниот фокус и најглавна надворешно-политичка цел на неговата влада и државата воопшто е интеграцијата во ЕУ.
„Без сомневања, ЕУ е нашиот најзначаен партнер, инвеститор и сигурно е дека сме природно настроени кон ЕУ во секоја смисла“, додава српскиот премиер, наведувајќи со сигурност дека ЕУ ќе ја прошири својата перспектива на овој регион на што укажува случајот со Хрватска.