Дајте му ги сите пари за кампања за бојкот на референдумот на Антонио Милошоски, дајте ги нашите пари на сите Мицковци, Апасиевци, Солзи, Бачевци, Ванковци нека не потопат, нека не удават, нека не закопат, нека не прогласат за живи мртовци, за остатоци на груевизмот, тие, ние, целата наша иднина.
Отстранете го, заробете го, покријте го и одведете го во непознат правец Талат Џафери, кој му објаснува на Милошоски дека парите што се издвоени за кампања нема да се делат на секој пратеник одделно, туку Собранието ќе закупи медиумски простор пропорционално врз основа на бројот на вкупниот број на пратеници кои ќе се изјаснат „за“ или „против“.
Дајте им ги сите пари на овој свет на оние што ќе бојкотираат, на оние што се против нашата иднина, на сите Мицковци, Милошовци, Апасиевци, Солзи, Бачевци, Ванковци.
Нека расцветаат сите бојкотирачи, анти-НАТО и анти-ЕУ војници, русофили и путинисти, дајте им крилја, отворете им ги небесните патеки, нека завладее царството на подземјето, на смрдливите канали по кои течат исперените мозоци, политички аутистичните слогани, нека се виорат црвени, руски знамиња, нека завладее теророт на путинизмот.
Нека ги полијат Заев, Димитров, Шеќеринска, Џафери со пари сите Мицковци, Милошевци, Апасиевци, Солзи, Бачевци, Ванковци, нека не закопаат докрај во оваа дупка во која Македонија не може сама да се извлече без европска, демократска помош, после груевизмот од кој секако дека не можеме да се опоравиме и да здивнеме.
Да останеме осиромашена, заробена држава во груевистичките и мијалковистичките инсталации во сите пори на општеството, во криминалот, корупцијата, непотизмот, неслободите, бесчестието.
Нека ги отворат тие врати на старите неслободи во груевизмот, сега нека ги рашират Заев, Димитров, Шеќеринска, Џафери, нека им ги дадат лопатите и ашовите на оние кои бојкотираат, на оние кои се против нашата иднина, нека ги благословат со нашите пари да не закопаат.
Заев, Димитров, Шеќеринска, Џафери сега се на потег- нека им ја засадат со илјада цвеќиња таа дупка на сите Мицковци, Милошевци, Апасиевци, Солзи, Бачевци, Ванковци, дупка во која ќе бидеме фрлени сите, на оние со бојкотот и против референдумот, која сега со нашите пари ќе биде ископана најдлабоко што може, затоа што никогаш не е доволно дно, никогаш доволно изолација, национализам, омраза, немаштија, стравови и порази.
Затоа што ако тоа не се случи, ќе биде огромна штета ако не не не оглуват нивните пискави тонови полни со горчина и омраза кон цивилизациските, европски вредности, кон нашата иднина, кон сета борба која ја водевме, која ја извојувавме, никогаш повторно да не се врати груевизмот во оваа земја.