Екс премиерот Никола Груевски од Албанија каде што влегол преку илегален премин, до неговата последна дестинација Бидимпешта постојано бил придружуван од унгарски дипломати. Според непотврдени информации, тој дури и една ноќ поминал во Амбасадата на Унгарија во Тирана.
Ваквата улога на дипломатите кои му помагаат на осудено лице да бега од издржување на затворска казна за опозицијата во Унгарија е скандалозна. Tие го обвинија Орбан дека помага во „криумчарење и нелегален премин на лица“.
„ Албанската полиција потврди дека осудениот политичар ја напуштил Алабнија со автомобил на унгарската Амабсада во Тирана. Владата на Орбан не само што не го брка осудениот криминалец, туку со пари од даночните обврзници му помага илегално да го помине граничниот премин“ рече извршниот потпретседател на Демократската коалиција Чаба Молнар, и побара за бегството на Груевски и помошта која ја имал од унгарските власти да се дебатира во Собранието.
Дипломатот Сашко Тодоровски вели дека дипломатите имаат право да заштитуваат лица на кои им е згарозена безбедноста или животот им е во опасност и тоа се смета како хуманитарна постапка, која беше секојдневна практика во Студената војна, посебно за лица кои бегаа од Истокот.
„Во Студената војна ова беше секојдневна дипломатска задача – заштитата е еден од најстарите институти во дипломатијата. Сега во поново време тоа се користи во екстремни ситауции и за земји кои се проценуваат како небезбедни од аспект на својот правен систем. ЕУ проценила дека не сме таква земја, а Унгарија одеднаш одлучила да не се согласува со политиката на ЕУ и да мисли дека треба да се преземе тој чекор“ анализира Тодоровски.
Во дадената ситуација е злоупотребен овој институт и ако ме прашувате дали е оправдано – јас мислам не,“ вели Тодоровски и додава дека за оваа процедура треба да се разговара со унгарските власти за да се види кои биле причините за да му понудат заштита на Груевски.
Во ситуации кога треба да дадат заштита дипломатите не дејствуваат секогаш по налог на министерот за надворешни работи, туку и врз основа на безбедносни проценки за лицето. Останува нејасно кои биле аргументите на унгарските дипломати активно да се вклучат во бегството на Груевски.
Тодоровски очекува од МНР да контактира со унгарските власти и да се утврди кој бил мотивот да го заштитат Груевски.
Како што соопшти албанската гранична полиција, Груевски со возило на унгарската амбасада во Тирана ја напуштил територијата на Алабнија и влегол во Црна Гора. Црногорските власти регистрирале дека тој во Црна Гора влегол со дипломатско возило „фолксваген џета“ со регистерски таблички CD 1023 во друштво со Кулсар Антала и Варсалваи Шаба кои имале унгарски дипломатски пасоши.
Истиот ден во 22 и 16 часот ја напуштил Црна Гора на граничниот премин Добраково. Во Србија влегол со автомобил во кои биле Часар Јозеф Золтан и Фелеџази Шаба. Обајцата имаат дипломатски пасоши на Унгарија.
Канцеларијата на Орбан денеска овие информации ги нарече „претпоставки“ и повтори дека Унгарија на ниту еден начин не му помогнала на Груевски да побегне и да ја напушти Македонија.
За барањето за азил наведуваат дека ќе одлучуваат во согласност со унгарскиот закон и со меѓународното право.
Никола Груевски кој беше осуден на двегодишна затворка казна за Тенк и против кого се водат уште неколку случаи на СЈО, ја напушти Македонија, кога веќе му беше потврдена затворската казна и му беа одбиени сите жалби за одложување на извршување на казната.
Според МВР тој побегнал ноќта меѓу 8 и 9 ноември кога преку илегален премин ја напуштил земјава. Освен ова, МВР не објави никакви други детали за бегството на Никола Груевски. Тој пред три дена на Фејсбук објави дека е во Будимпешта.