Дејвид Мојс, менаџерот на Евертон е засега најголемиот фаворит според светските спортски обложувалници да го наследи Сер Алекс Фергусон на кормилото на Манчестер Јунајтед.
Според анализите и коефициентите, потоа следат Жозе Мурињо и Јирген Клоп, а понатаму тројца поранешни играчи под раководство на Фергусон, Оле Гунар Солскјер, Лоран Блан, и Гери Невил.
Спортскиот веб сајт Goal.com тврди дека играчите на Јунајтед денес дознале за веста дека следен нивен тренер ќе биде Мојс.
50-годишниот Дејвид Мојс ќе даде оставка на Гудисон Парк за да го преземе товарот од успесите на Сер Алекс Фергусон. Неговиот договор истекува на крајот од сезоната, по што се очекува процесот да биде неизбежен и брз.
Мојс е долгогодишен пријател на Фергусон и се очекува двајцата да уживаат во соработката следната сезона, откако легендарниот менаџер ќе се придружи на бордот на директори.
Се верува дека Мојс е личен фаворит на Фергусон, во пресрет на големиот број менаџери од светско реноме со докажани Европски успеси, кои би биле заинтересирани да го наследат Фергусон.
Мојс го воспостави Евертон како еден од топ-шест клубовите за време на неговото 11-годишно владеење на Мерсисајд и покрај тешкотиите кој клубот од Ливерпул ги имаше со буџетот во споредба со ривалите.
Тој нема освоено трофеј за време на своето менаџирање со Евертон, но Јунајтед веруваат во неговото искуство во Премиер Лигата, неговите мотивациони квалитети, идејата за фудбалот, како и способноста да го извлече максимумот од своите играчи.