Најстариот заболен од коронавирусот е на возраст од 101 година, според извештајот, а во врска со тоа од каде е овој пациент и дали ја преживеал инфекцијата, од ИЈЗ појаснуваат дека станува збор за лице од Демир Хисар кое починало дома.
Направени се за 6,2 проценти повеќе тестови за ковид-19 во однос на неделата претходно, пишува во најновиот неделен извештај на Институт за јавно здравје (ИЈЗ) за периодот од 6. до 12. декември годинава.
Тестирани се 17.997 материјали во лабораториите во кои се врши молекуларно и антигенско тестирање за присуство на SARS-CoV-2, а регистрирани сe 2.090 нови позитивни случаи од 34 градови во државата со намалување од 8,1 проценти во однос на минатата недела, се вели во извештајот.
Возраста на заболените се движи од 0 до 101 година (просек – 45,4 години). Најголем број на заболени се на возраст над 60 години – 55.841 (25,4%), додека највисок специфичен морбидитет од 13.207,1/100.000 се регистрира кај возрасната група од 50-59 години (n=37.014).
Најстариот заболен од коронавирусот е на возраст од 101 година, според извештајот, а во врска со тоа од каде е овој пациент и дали ја преживеал инфекцијата, од ИЈЗ појаснуваат дека станува збор за лице од Демир Хисар.
Овој 101-годишник, за жал, не ја добил битката со вирусот. Тој починал дома од компликации од болеста, а смртта во ИЈЗ била пријавена на 8. декември годинава.
26 граѓани повторно заболеле од ковид-19
Во овој период, од 6. до 12. декември, регистрирани се заболени лица во сите возрасни групи. Најзастапена е возрасната група на лица на возраст над 60 (24,1 проценти), а најмалку заболувале кај возрасната група од 0 до 9 години (4,4 проценти).
– Се забележува намалување на бројот на заболени кај сите возрасни групи. Во однос на дистрибуцијата по пол, пријавени се 54,4 проценти лица од женски и 45,6 проценти од машки пол. Оздравеле 2.256 лица кои биле хоспитализирани или на домашно лекување, стои во извештајот.
Во минатата недела биле пријавени 26 повторни инфекции со ковид-19, што е намалување од 35 отсто во однос на претходната недела.
Пријавени биле 66 смртни случаи во 20 градови, што е намалување од 2,9 отсто во однос на претходната недела – најмногу починати се од Скопје (26), а во однос на возраста, најголем број, вкупно 58 од починатите, се постари од 60 години.
Седуммина починати се пријавени кај возрасната група од 50-59 години и еден на возраст од 40-49 години.
Според извештаите од болниците моментално се хоспитализирани 427 лица, а од нив 247 се на кислородна поддршка и 13 на инвазивна/неинвазивна механичка вентилација.
Во однос на симптоми пријавени кај заболените, најчесто се регистрирани температура (60,0%), кашлица (44,8%) и малаксаност (44,2%). Регистрирани се 57.746 (26,3%) асимптоматски случаи.
(Љ.Б.)