По речиси осум часа демонстрации, групата граѓани се повлече од општина Центар. Зад нив останаа купишта ѓубре, стотици табли искршени јајца и гајби згмечени домати на плочникот пред општина Центар и внатре во дворот на општината.
Во бараката број 6 се уште трае седницата на Советот на општина Центар. Откако по речиси 7 часа успеаја да го утврдат дневниот ред, сега се стасани до точката број 2, за која се дискутира повеќе од еден час. Има вкупно 16 точки на дневниот ред, а седницата се одвива само во едната половина од просторијата за Советот бидејќи претходно настанаа оштетувања од јајцата со кои демонстрантите фрлаа во салата. Скршени се три прозорци, а целата една половина од просторијата е извалкана од јајцата кои завршија внатре во просторијата, па сега сите советници наместо едни спроти други, седат едни до други.