Македонската кошаркарска репрезентација стартува денес. Надежите кај навивачите не стивнуваат, играчите ја смируваат атмосферата. Првенството го отвораме против Црна Гора, земјата со која и ја започнавме нашата Одисеја на Евробаскетот во Литванија 2011 година и во кој прв натпревар загубивме. Тоа е доволен мотив за „капитенот Антиќ и компанија“ да ги израмнат сметките со репрезентацијата која годинава во своите редови го нема НБА кошаркарот на Минесота Тимбервулфс, Никола Пековиќ.
Низ свечена церемонија одржана на плоштадот во Љубљана синоќа, Генералниот секретар на ФИБА, Камил Новак, Европското првенство во кошарка 2013 во Словенија, го прогласи за отворено.
Но овој пат и покрај отсуството на многу од НБА ѕвездите, товарот за нашата репрезентација ќе биде уште поголем. Во 2011 во Литванија бевме аутсајдери без голем респект а богами и наши очекувања, а од денес до 22 септември другите репрезентации знаат со што се соочуваат па оттаму не очекува и потешка игра, за што сведочи и изјавата на германскиот селектор Франк Менц кога поразот на своите кошаркари во Улм, го опиша како пораз од една од најдобрите европски селекции. Влегуваме со нешто поразличен состав но со истата стартна петорка која летото 2011 година им го направи на сите Македонци поубаво.
Летово тргна супер за репрезентацијата: најголемата вест е потписот на капитенот Перо Антиќ за НБА тимот Атланта Хоукс, враќањето на Тодор Гечевски по иницијатива на своите соиграчи и освојувањето на купот во Улм, Германија.
Главните во репрезентацијата Антиќ, Мекејлеб, Гечевски, Илиевски, браќата Стојановски, Чековски, Самараџиски и останатите од тимот, годинава ќе се натпреваруваат во групната фаза против Босна на кошаркарот Мирза Телетовиќ, Латвија каде што клучната улога во тимот ја носи Даирис Бертанс, Клеиза од Литванија, Црна Гора и Вучевиќ, и Србија која годинава во својот тим ќе го нема плејмејкерот Милош Теодосиќ.
Фаворит број еден за освојување на европскиот трофеј е Шпанија со коефициент 2.4.
Втор фаворит е Грција со коефициент 4,5 но и Франција. Златен медал за Македонија коефициентот вели тешко, бројката е 50.
Според изјавите на селекторот Алеш Пипан, ќе играме меч за меч.
„Подготовките минаа во најдобар можен ред. Играчите максимално се залагаа и сега само чекаме првенството да започне. Нашиот стил на работа е познат. Одиме меч по меч, мислиме само на следниот противник и ништо повеќе“, изјави тој.
.jpg)
За очекувањата со кои се соочува кошаркарската репрезентација говори и кошаркарот кој се очекува да биде предводник во нападот Лестер Бо Меккејлеб
– Ќе биде тешко да се повтори она што го направивме пред две години. Но ќе се обидеме да направиме најдобро од оваа нова ситуација, најдобро што можеме, напомена популарниот Бо.
>> Перо Антиќ сака вечерва да и се реваншираме на Црна Гора
За капитенот Антиќ ова е последно репрезентативно натпреварување.
– Ова европско првенство дефинитивно ќе биде последно репрезентативно играње за мене. Сега секое утро телото ми кажува, ова е дефинитивна порака, вели тој.
Мозаикот е нареден, се очекува нова епизода напори на кошаркарите, и среќна завршница на турнирот.