Во Велика Иванча денеска попладне ќе бидат погребани 13-те жртви на масакрот извршен од страна на Љубиша Богдановиќ, кој вчера почина во Ургентниот центар во Белград.
Кај портите на црквата се поставени 13 клупи на кои се поставени ковчезите со убиените, а погребот е закажан за 13 часот.
Се очекува на погребот пред селската црква да присуствува српскиот премиер Ивица Дачиќ и градоначалникот на Белград Драган Ѓилас.
“Очекуваме дека ќе присуствуваат и премиерот Ивица Дачиќ, градоначалникот Драган Ѓилас и целото раководство од Белград. Покани се испратени до Владата на Србија, сите градски совети и општините кои се во непосредна близина на Младеновац. Организиравме и два автобуси за граѓаните кои немаат свој превоз”, вели Дејан Вичовац, шеф на штабот за организирање на погребот.
Монструзното дело во Србија се случи во вторникот, кога Богдановиќ во пет куќи уби 13 луѓе, меѓу кои и двегодишниот син. Потоа Богдановиќ пукал во сопругата, а се обиде и да се самоубие.
Полицијата сеуште трага по мотивот на ова масовно убиство. Клучниот сведок, сопругата на Богдановиќ ќе биде сослушана откако ќе биде стабилизирано нејзиното здравје.