Дивата поетска приказна за животот на една жена, „Нимфоманка“ во режија на Ларс вон Трир, денеска е филмот во фокусот кој ќе се прикажува во рамките на фестивалот „Синедејс“. Проекцијата од селекцијата Гала премиера ќе се прикажува во 20 часот во кино Милениум.
„Нимфоманка“ е дива и поетска приказна за животот на една жена, од нејзиното раѓање до 50-тата година, која ни ја раскажува главниот лик, самодијагностицираната нимфоманка, Џо. Една студена зимска ноќ, стариот, шармантен, ерген Селигман ја наоѓа Џо, претепана, во една уличка. Тој ја носи дома во својот стан, каде и ги негува раните, прашувајќи ја за нејзиниот живот. Селигман внимателно ја слуша Џо, која во следните осум поглавја на долго и широко му ја раскажува приказната за својот живот, богата со асоцијации и вметнати инциденти.
Главните улоги ги играат Шарлот Гинзбург и Стелан Скарскард, а помеѓу нив се појавуваат и Шија Лебоф, Кристијан Слејтер, Ума Турман и Вилем Дефо.
Помеѓу останатите филмови од програмата на „Синедејс“, во кино Фросина МКЦ со почеток во 19 часот ќе се прикажува и српскиот „Непослушни“ на Мина Џукиќ.
Станува збор за Лани и Лазар кои во детството биле најдобри пријатели. Кога Лазар се враќа, по подолг престој во странство, за погребот на татко му, Лени копнее повторно да се зближи со нејзината сродна душа но се уште ги чувствува годините отуѓеност меѓу нив. Сепак, во надеж да ја избегне монотонијата на возрасниот живот, заминува со Лазар на едно спонтано патување со велосипед низ прекрасната сончева селска природа…Лени ќе се најде пред одлука дали нивното неморално однесување е врска врз која таа може да изгради живот.
Улогите ги толкуваат Хана Селимовиќ и Младен Совиљ.
Од останатите филмови на фестивалот кој засега многу успешно се одвива без никакви проблеми и покрај малиот буџет, на програмата се и „Тир“ (кино Фросина 21 часот) на Алберто Фасуло, и документарниот филм „Прекрасна врева“ (кино Фросина 23 часот) за андерграунд музичките движења од крајот на 20 век.