По четири години судски процес напладне во Kривичниот суд во Скопје ќе биде изречена пресудата во случајот „Насилство во Центар“ каде е обвинет поранешениот министер за транспорт и врски, Миле Јанакиески.
-Ниту сум прифатил, ниту сум дал насоки, ниту сум поттикнувал, рече Јанакиески во судот.
Тој смета дека обвинението отсликува толкуван разговор од објавените „бомби“ и дека истото е креирано според исказот на осудениот сведок Томислав Лазаров. Јанакиески на рочиштето го праша судот дали треба да се најде жртвено јагне за да ја понесе одговорноста за постапките на Груевски, по што додаде дека е свесен какво влијание имале аудиоснимките кај јавноста, која го осудила уште при нивното објавување.
Обвинителката Фатиме Фетаи, која беше дел и од поранешното Специјално јавно обвинителство, кое го отвори овој случај, побара максимални казни за обвинетите. Обвинителството пред две рочишта го прочисти обвинението и при тоа го повлече обвинението за поранешната пратеничка Даниела Рангелова.