Околу 10 000 пациенти од цела држава кои имаат закажано прегледи, снимања, операции во среда на „денот на дрвото“, ќе бидат пренасочени за да дојдат во сабота. Надлежните во здравството прифатија овој ден да биде неработен, а за сите закажани интервенции пациентите да бидат известени поединечно, еден по еден.
Но, има пациенти кои немаат мобилни или немаат никаков телефонски контакт, а доаѓаат од рурални средни, од селата, доаѓаат од далеку и можеби не се информирале од телевизија дека не треба да доаѓаат во среда. Ги прашавме надлежните во Министерството за здравство дали болниците успеале да ги презакажат сите пациенти и како ќе ги обесштетат тие што ќе се појават на преглед бидејќи не биле информирани.
-При добивање на електронски упат задолжително е пациентите да оставаат број од мобилен или фиксен телефон. Многу малку пациенти не оставиле телефонски броеви, изјави Милан Аризанковски проект-менаџер во „Мој термин“.
Од Министерството за здравство не објаснија зошто „денот на дрвото“ мора да биде прогласен за неработен и во здравството. НОВА ги праша и граѓаните што мислат, дали ова презакажување на интервенците може да предизвика хаос. Во видеото погледнете што одговорија граѓаните.
Според информациите на НОВА, болниците сепак не успеале да ги информираат сите пациенти. На Клиниката за радилогија неофицијално велат дека тие не се во можност да ги презакажуваат пациентите бидејќи тие го немаат контактот со нив. Тоа треба да го сторат матичните лекари или специјалистите кои ги закажале снимањата. На Клиниката за дигестивна хирургија не информираат дека им презакажале скоро на сите пациенти, но не успеале тоа да го сторат со сите. Како ќе се одвиваат работите во текот на утрешниот ден останува да се види.