Министерството за здравство преку соопштение информираше што е преземено во врска со двата смртни случаја од вирусна хеморагична треска од селото Симница.
“Извршен е епидемиолошки увид, анкета на домаќинствата од починатите, извршена дезинфекција и дератизација во домовите и околината на починатите лица, земени мостри од водата за пиење, извршена едукација за лични превентивни мерки и совет за јавување на лекар при појава на први симптоми на болест”, вели министерството.
Министерството добило податок дека починатите и поголем дел од семејството работеле и често престојувале на свое приватно бачило.
Тимот од експерти од областа на здравството повторно излегле на терен и го посетиле бачилото во месноста наречена Буковиќ, во близина на преминот Стража.
“На бачилото не се затекнати ниту лица ниту овци. Извршена е дезинфекција во затворениот објект, во отворениот објект и неговата непосредна околина како во близина на магацинот. Исто така, дезинфекција беше направена и на пошироката околина во самиот ограден простор и околу него”.
Комисијата за заразни болести добила “серолошки позитивни резултати за присуство на хантан вирус кај починатите лица” а потоа, Центарот за јавно здравје Тетово и подрачна единица Гостивар со 5 екипи извршил “комплетна дезинфекција и дератизација на сите објекти (домови, штали , околина) во селото Симница”.
Институтот за јавно здравство подготвил брошура наменета за здравствените работници за да можат тие “да ги освежат знаењата во врска со вирусните хеморагични грозници, поставена на веб страна на ИЈЗ и доставена до центрите за јавно здравје за споделување со матични лекари и други здравстевни работници” а подготвена е “брошура за општата популација, поставена на веб страна на ИЈЗ и доставена до центрите за јавно здравје”.